2014-imut Ukiumoortumik nassuiaat

Aallaqqaasiut

Inatsisitigut siunnersuisarfik IKIU imminut pigisoq ukiuni tallimani maanna ingerlareerpoq. Innuttaasut oqartussaasullu IKIU-mik ilisimasaqarnerat annertusingaatsiarsimavoq, aammalu 2014-imi saaffiginnittut 1.000-it missaannik amerlassuseqarput. Kalaallit Nunaat tamakkerlugu ornigullutik, oqarasuaatikkut e-mail-ikkulluunniit saaffiginnissutinik tigusisoqartarpoq, taakkulu pisortanut taamatullu inuinnarnut inatsisinut assigiinngitsorpassuarnut tunngasuusarput.

Kalaallit Nunaannut eqqartuussisaatsimut inatsimmi § 84, imm. 5 naapertorlugu IKIU tapiiffigineqarsinnaatitaasutut Inatsisinik Atuutsitsinermut Ministereqarfimmi Inuinnarnut Aqutsisoqarfimmit akuerineqarsimavoq. Tamanna tunngavigalugu Inuinnarnut Aqutsisoqarfik ukiumoortumik tapiissuteqartarpoq. IKIU-p kukkunersiuisumit atsiorneqartumik ukiumoortumik naatsorsuusiortarnissaa aammalu unatut ittumik ukiumoortumik nalunaarusiortoqarnissaa piumasarineqarluni tapiissutit tunniunneqartarput.

Siunertaq

Kalaallit Nunaanni tamarmiusumi innuttaasut, akeqanngitsumik sullinneqarnissamut aningaasaqarnikkut piumasaqaatinik naammassinnittut akeqanngitsumik inatsisitigut sullinneqarnissaat IKIU-mi siunertaavoq.

Kisiannili IKIU-p suliassani suliani aalajangersimasuni siunnersuisarnermit annertunerusussatut isigaa, tassami innuttaasut oqartussaasullu pisinnaatitaaffii pillugit qaammarsaanikkut paasissutissiisarnerup annertusineqarnissaanut IKIU suleqataarusuppoq.

Siunnersuisarfik naatsumik

IKIU 12. februar 2010-mi pilersinneqarpoq, innuttaasunullu 1. juni 2010-mi ammarneqarluni. Pisortat eqqartuussissuserisut atorlugit inatsisitigut siunnersuisarneranni aaqqissuussinerit nalinginnaasut Kalaallit Nunaanni innuttaasut isertitakitsut inatsisitigut siunnersorneqarnissamut pisariaqartitsinerannut naammannginnerat IKIU-p pilersinneqarneranut tunngaviuvoq.

IKIU Kalaallit Nunaat tamakkerlugu innuttaasunut inatsisitigut siunnersuisarpoq. Sullissiviup qitiusup innuttaasut siunnersortissarsiortut aammalu siunnersortit inatsisilerinermik ilinniarsimasut akornanni attaveqartitsisarneratigut, kiisalu pisariaqartillugu oqalutseqartitsineratigut tamanna ingerlanneqartarpoq. Taamaalilluni nunami sumiiffinnut, oqaatsinut, kulturimut suliassanullu tunngatillugu ajornartorsiutit, nalinginnaasumik innuttaasut namminneerlutik eqqartuussissuserisumut ikiortissarsiornerminni naammattoortagaasa atuutinnginnissaat IKIU-p anguniartarpaa.

Attaveqarfissat ammasarfiillu

Inatsisitigut siunnersuisarfiup nuna tamakkerlugu allaffia najukkami uaniippoq: Samuel Kleinschmidtip Aqq. 10, 3900 Nuuk.

IKIU-mut saaffiginninnermi allaffimmut orniguttoqarsinnaavoq, oqarasuaatikkut (324548) sianertoqarsinnaavoq, telefax-imik nassiussisoqarsinnaavoq imaluunniit e-mail-ikkut (ikiu@ikiu.gl) saaffiginnittoqarsinnaalluni.

Allaffik orniguttunut sianertunullu ataasinngornermiit sisamanngornermut nal. 9.00-imiit 15.00-imut ammasarpoq.

IKIU-p nittartagaraa www.ikiu.gl.

Ataasinngornermiit sisamanngornermut nal. 15.00 aamma 17.00 akornanni siunnersuisartut siumoortumik isumaqatigiissuteqareernermi oqarasuaatikkut imaluunniit nammineerluni saaffiginninnikkut naapinneqarsinnaapput. Tamatuma saniatigut mail-it akineqarnerisigut siunnersuisoqartarpoq.

Aqutsisut

Siulersuisut

Siulersuisut IKIU-p qullersaatut oqartussaasuupput. Ingerlatsinerup pingaarnerup pilersaarusiornissaanut siulersuisut akisussaasuupput. Tamatumani pingaartumik naatsorsuusiorneq naatsorsuutinillu akuersisarneq, kiisalu aalajangigassanut pingaarnernut aalajangiisarneq pineqarput.

IKIU suliffeqarfiummat imminut ingerlattoq, taamaalillunilu ilaasortaqanngitsoq piginnitseqanngitsorlu, siulersuisut imminnut isumagisuupput. Inuit pingasuniit tallimanut amerlassuseqartussaapput, taakkulu 2014-imi tassaapput:

  • Eqqartuussissuserisoq Anders Meilvang (siulittaasoq)
  • Eqqartuussissuserisoq Thomas Trier Hansen
  • Eqqartuussisoq Birgit Skriver
  • Eqqartuussissuserisoq Naja Joelsen
  • Inatsisartuni Folketingimilu ilaasortaq Sara Olsvig (11/2 2015-imi Inatsisartuni ilaasortamit Aaja Chemnitz Larsen-imit taarserneqarpoq)

Ulluinnarni aqutsineq

Allattoqarfiup ulluinnarni ingerlatsineq isumagisaraa. Tassani inniminniinerni isumaqatigiissutit, aningaasaqarnermik aqutsineq, journaliseeriineq, innuttaasut saaffiginnissutaannik suliaqarneq, nittartakkap ingerlaavartumik nutarterneqartarnera, sinerissamut angalanissanik pilersaarusiorneq ataqatigiissaarinerlu, kalaallisut-qallunaatut nutserineq (oqaluttaaneq taamatullu najoqqutassanik allassimasunik nutserineq) suliarineqartarput.

Allattoqarfik allattoqarfimmi pisortamit, siulersuisut siulittaasuannik suleqateqartumit aqunneqarpoq.

Aamma 2014-imi ilinniartoq ikiorti ukiup affaani sulisussaq atorfeqartinneqarpoq, taamatullu siunnersorti ataaseq allattoqarfimmi pisortamut taartaasartoq aalajangersimasumik suleqataatinneqarluni.

Init

IKIU Nuup qeqqani peqatigiiffiit suliffeqarfiillu imminnut ingerlattut allat allaffeqarfeqatigalugit inissisimavoq. Siunnersuisarfiup illoqarfiup qeqqanut inissinneqarnerani IKIU ornikkuminarnerujussuanngorsimavoq.

Allaffeqateqarnermi allattoqarfimmi pisortap allanik suleqateqarsinnaaneranut periarfissiivoq, taamaalillunilu toqqissisimanissamut ineriartornissamullu tapeqartinneqarluni.

Siunnersortit namminneq piumassutsiminnik akissarsiaqaratillu sulisut

2014-imi inatsisilerituut, namminneq piumassutsiminnik akissarsiaqaratillu sulisut, siunnersuinermik suliaqartut 12-it missaanniipput. Taakku pingaartumik eqqartuussissuserisut allaffeqarfiini, pisortani oqartussaasuni aamma ingerlatseqatigiiffinni Namminersorlutik Oqartussanit pigineqartuni atorfeqarput. IKIU siunnersortissanik nutaanik pissarsiortuarpoq, IKIU-mi suliffeqarfiit allat assigalugit sulisut sukkangaatsiartumik taarseraattarmata.

Aningaasaqarneq

Inuinnarnut Aqutsisoqarfiup ingerlatsinermut tapiissutai 2014-imi 995.000 koruuniupput, 2013-imut naleqqiullutik 10.000 koruuninik ikinnerullutik. IKIU aamma 2014-imi Tips- og Lotto-p aningaasaateqarfianit 86.500 koruuningajannik tapiiffigineqarpoq, ilinniartut inuiaqatigiinni kalaallini pisinnaatitaaffiinik akisussaaffiinillu paasititsiniaanermut atugassiissutigineqartunik. Internetimut oqarasuaatinullu aningaasartuutinut suli TELE Greenland A/S aningaasalersuisuuvoq aammalu Kalaallit Nunaata Radioa (KNR) sinerissami illoqarfinnut angalanernut atatillugu innuttaasunut paasisitsiniaasarnermi aningaasaliisarluni. Kiisalu IKIU LauritzenFonden-imit 25.000 koruuninik aningaasaliiffigineqarpoq, allattoqarfimmi pisortap siunnersortitut ilinniarneranut atatillugu angalanermut aningaasartuutinut atugassanik.

IKIU-p kukkunersiuisua 2014-imut Ukiumoortumik Nalunaarummut oqaaseqaatimini ilisimatitsivoq, nammineq isummani malillugu nalunaarut IKIU-p aningaasaqarnerani pissutsinut eqqortumik takutitsisoq, aammalu tunuarsimaarfeqarnissamut tunngavissiinngitsoq. Aamma isornartorsiuiffiusunik oqaaseqaateqartoqanngilaq.

IKIU-p aningaasaqarnera pillugu annertunerusumik paasisaqarusunnermi 2014-imut Ukiumoortumik Nalunaarusiaq innersuussutigineqarpoq.

IKIU-p siunnersuisarnera

IKIU inatsisitigut suliassaqarfippassuarnut tunngasunik siunnersuisarpoq – taakku pisortanut inuinnarnullu inatsisinut tunngasinnaapput. Siunnersuisarnermi suliassanut atatillugu sullissisoqarneq ajorpoq, kisiannili suliat ilaanni IKIU allagaatinik takunninnissamut ikiuuttarpoq, aammalu suliani allani oqartussaasunut allakkiornermi IKIU ikiuuttarluni. Suliat nalinginnaasumik pisariusarput, aammalu sullissinermi annertuumik kukkuffiusimasarlutik.

Sullinniakkat

IKIU Kalaallit Nunaanni tamarmiusumi innuttaasunut, akeqanngitsumik sullinneqarnissamut aningaasaqarnikkut piumasaqaatinik naammassinnittutut isumaqarfigineqartunut siunnersuisarpoq. Tassalu inunnut isertitassatut killiliussat sinnerlugit isertitaqartunut, suliffeqarfinnut imaluunniit pisortani oqartussaasunut inatsisitigut ikiuuttoqartanngilaq.

Aamma pasisat unnerluussallu pissutsinut, pasinninnermut unnerluussinermulluunniit attuumassuteqartunut siunnersorneqartanngillat. Pinerluttulerinermi sulianut tunngassutillit illersuisumut apeqqutigineqartassapput.

Aamma nalinginnaasumik ”suliani, ingerlatsinermi oqartussaasunut tunngasuni imaluunniit suliarineqartuni, ilitsersuineq siunnersuinerlu pisariaqartinneqartumik oqartussaasunit isumagineqartoq isumaqarfigineqarpat” siunnersuisoqartanngilaq. Kisiannili IKIU-p siunnersuisarnerani annikitsuunngitsut pissutsinut, pisortani oqartussaasunit suliarineqartunut tunngasuusarput, taakkunani akuttunngitsumik kukkusoqartarmat (soorlu tunngavilersuutitaqanngitsut, maalaaruteqarnissamut ilitsersuutitaqanngitsut, akuusunut tusarniaanertaqanngitsut imaluunniit piffissami sivisuallaami suliarineqarsimasut), imaluunniit innuttaasup pisariaqartinneqartumik ilitsersuunneqarsimanani misigisimasarmat.

Angalasarnerit

Kalaallit Nunaata nunataani sumiiffiit pissutaallutik IKIU innuttaasunut Nuup avataani najugalinnut siunnersuiniarluni sulinermut atatillugu angalasariaqartarpoq. Siunnersuisumik naapitsisinnaanissaq innuttaasunut isumaqartorujussuusarpoq. Tamatumani pingaartumik pissutsit inunnut tunngasut eqqarsaatigineqarput. Aamma angalasarnerit IKIU-mut tunngatillugu aammalu IKIU-p siunnersuisarnera pillugu paasisimasaqarnerulernissamut pingaaruteqartorujussuupput. Kiisalu IKIU Kalaallit Nunaat tamakkerlugu inatsisitigut ajornartorsiutaasartunik paasisaqarluartarpoq.

2014-imi apriilimi IKIU ulluni pingasuni Ilulissaniippoq, ilaatigut ilinniartut inatsisinut tunngasunik paasissutissinneqarnissaat, kisiannili aamma Ilulissani innuttaasut siunnersorneqarnissaat ilitsersorneqarnissaallu siunnerfigineqarluni. Tamatuma saniatigut IKIU ulluni pingasuni Sisimiuniippoq, aammalu ulluni pingasuni Qaqortumiippoq Narsamiillunilu, taakkunanissaaq aamma ilinniartut inatsisinut tunngasunik paasissutissinneqarnissaat, kisiannili aamma Sisimiuni, Qaqortumi Narsamilu innuttaasut siunnersorneqarnissaat ilitsersorneqarnissaallu siunnerfigineqarluni.

2014-imi ulluni 12-ini Kalaallit Nunaata kujataani angalasoqarpoq, taakkunani illoqarfiit/nunaqarfiit katillugit 12-it tikinneqarlutik, taakkunanilu saaffiginnittut katillugit 77-iupput.

IKIU-p Tips- og Lotto-p aningaasaateqarfianit tapersiiffigineqarnissamik qinnuteqaataa akuerineqassappat, 2015-imi illoqarfiit ilinniarfeqarfiit, tassalu Aasiaat, Tasiilaq immaqalu Uummannaq tikeraarneqassapput.

Angalanerni najukkani eqqartuussiviit nunaqarfiillu allaffii nalinginnaasumik ininik atugassiisarput, tamannalu ingerlalluartorujussuusarpoq.

Inatsisilerinermi suliassaqarfiit kisitsisitigullu paasissutissat

2014-imi IKIU saaffiginnissutinik 1.000-t inorlugit tigusaqarpoq.

IKIU-p naliliinera malillugu Kalaallit Nunaanni inatsisitigut siunnersorneqarnissamik pisariaqartitsineq annertoorujussuuvoq, aammalu saaffiginnissutit, IKIU-mit tiguneqartut pisariaqartitsinerpiamik ersersitsinngitsut isumaqartoqarpoq. IKIU pisariaqartitsinermut kisitsisitigut paasissutissanik peqanngilaq, kisiannili saaffiginnissutinit amerlasuut tunngavimmikkut inatsisitigut ajornartorsiornermut tunngasuupput, tamannalu inatsisitigut ikiorserneqarnissamik pisariaqartitsinerup annertuneranut takussutissatut isigineqarsinnaavoq. Taamatut paasinninneq aamma nammineerlutik piumassutsiminnik siunnersuisartut ingerlatsivinni imaluunniit eqqartuussissuserisut allaffiini atorfimminnit nalinginnaasunit misilittagaannut naapertuuppoq.

Ilaqutariinnermut isumaginninnermullu inatsisit

Ilaqutariinnermut isumaginninnermullu inatsisinut suliassaqarfik pillugu saaffiginnissutit amerlanersaat angajoqqaatut oqartussaanermut aamma averusernermut/avinnermut tunngasuusarput. Taakku pillugit saaffiginnissutinut atatillugu siunnersuisarneq immikkut oqaaseqarnissamut tunngavissiinngillat. IKIU inatsisitigut tunngavissanik, aammalu innuttaasup pisumut aalajangersimasumut qanoq iliuuseqarsinnaaneranut siunnersuisarpoq.

Kisiannili angerlarsimaffiup avataanut inissiisarnerit pillugit saaffiginnissutit oqaaseqarnissamut tunngavissiipput. Tamatumunnga kisitsisitigut paasissutissat pissutaavallaanngillat, kisiannili pissutsinut, innuttaasunit nassuiaatigineqartunut tunnganerullutik.

IKIU arlaleriarluni innuttaasunik, angerlarsimaffiup avataanut inissiinermi pissusiviusunik inatsisitigullu tunuliaqutaasunik naammattumik ilisimatinneqarsimanngitsunik naammattuuisarpoq, taamatullu aamma ingerlatsivik angerlarsimaffiup avataanut inissiinernik atorunnaarsitsissappat piumasaqaatit suut naammassineqartussaanersut pillugu paasissutissinneqartarsimanngillat.

IKIU suliassanik sullissinerpianik suliaqarneq ajormat, taamaattumillu ingerlatsivimmut attaveqartarani, suliassanik sullissinerpiaat pillugu IKIU annertunerusumik nassuiaateqarsinnaanngilaq. Kisianni pisuni arlalinni suliassanik sullissinermi annertuumik kukkusoqartarsimasoq qularutigineqanngilaq.

Atorfinitsinneqarnermut inatsisit

Atorfinitsinneqarnermut inatsisinut tunngatillugu saaffiginnissutit akissarsiat, soraarsitaaneq atorfinitsinneqarnermilu isumaqatigiissutit pillugit apeqqutinut tunngasuunerusarput.

Soraarsitaanermut tunngatillugu apeqqutit pingaartumik, innuttaasut piffissamik sivikitsumik periarfissinneqarluni (periarfissinneqaraniluunniit) soraartitaasarnerinut, imaluunniit naammattunik paasissutissinneqarnerani soraartitaasarnerinut tunngasuunerusarput. Innuttaasut taakku sunik pisinnaatitaaffeqarnersut, aammalu pissutsit qanoq iliorunik pitsaanerpaamik isumagisinnaaneraat pillugu IKIU-p siunnersortarpai.

Taarsiissutit

Taarsiissuteqartarneq pillugu saaffiginnissutit, IKIU-mit tiguneqartartut, pingaartumik inunnik ajoqusertoqarnerani taarsiissutinut tunngasuusarput. Kisiannili aamma innuttaasup amigaatilinnik pisiaqarsimalluni taarsiiffigineqarnissamut pisinnaatitaaffeqarsorinera pillugu saaffiginnissutinik tigusaqartoqartarpoq. Tassanili saaffiginnissutit pisinermi pisinnaatitaaffinnut/amigaateqarnermut nalunaarutinut tunngasuunerusarput.

Inunnik ajoqusertoqarnerani taarsiissutissat pillugit saaffiginnissutit ilaat ajoqutinut nutaanngitsunut, ajoqusiisumut piumasaqaateqarfiusinnaajunnaareersunut tunngasuusarput. Tamatumunnga taarsiissuteqarnissamut piumasaqarsinnaanerup nutaanngilinera, imaluunniit pissutsit, ajoqusiisup akisussaaffigisinnaasaannik uppernarsaanissamut ajornarsereertarnerat pissutaasinnaavoq. Piffissap sivisuneranut nassuiaatitut innuttaasut ilaasa pisinnaatitaaffimminnik siunnersuisinnaasunik saaffiginniffissaqannginnertik innersuussutigisarpaat.

Ajoqusernerit, innuttaasut sulitillutik ajoqusernertut isigisaat pineqartillugit, sullivimmi ajoqusernermut taarsiiffigineqartarneq pillugu maleruagassanik sulisitsisumit naammattumik nassuiaanneqarsimanatik, aammalu piffissami ajoquserfiusumi avataanit ilitsersuisussaqanngitsutut innuttaasut akuttunngitsumik misigisimasarput. Taamatut pisariaqartitsinermut IKIU suleqataasarpoq.

Akiitsunut tunngasut

Saaffiginnissutit amerlasuut akiitsunut tunngasuusarput, taakkunanilu innuttaasut akiitsoqarnerminnut tunngaviusunik paasinnissinnaasanngillat. Matumani tunngaviusartut marluupput: Aapparisimasarlu akiligassanik nammaqatigiinnermi akiitsut aammalu pigisanik kingusinnerusukkut naleeruttunik akilersuilluni pisinermi akiitsut. Akiitsunut tunngatillugu saaffiginnissutit akuttunngitsumik Inissiaatileqatigiiffik INI A/S-imut aamma Iserit A/S-imut tunngasuusarput, amerlasuut pingaartumik Kommune Kujallermeersuusarlutik.

Nammaqatigiilluni akiligassaqarnerup, pingaartumik averusernerup avinnerullu kingorna atuutiinnartinneqartup annertussusia kingunerisassaaluunniit innuttaasut ilaasa paasiuminaatsittarpaat. Taamatut pisoqartillugu ilaatigut akiitsuni atugassarititaasut, kisiannili aamma akiligassaqarfiit inatsisitigut malersuisinnaanerat (akiliisitsiniartarfik akiliisitsiniartartullu) pillugu innuttaasut pisinnaatitaaffiinik pisussaaffiinillu paasisaqarniarneranni IKIU siunnersuisinnaavoq. Tamatuma saniatigut aamma nammaqatigiilluni akiligassaqarnermi qanoq inisisimanerat pillugu IKIU nassuiaasinnaavoq ilitsersuisinnaallunilu.

Innuttaasunik pigisat akilersorlugit pisiarisimasatik tammarsimagaluartut, aserorsimagaluartut allamilluunniit peqquteqartumik naleerussimagaluartut suli akiitsunut akilersuisussaatitaanerminnik paasinnissimanngitsunik IKIU naammattuuisarpoq. Innuttaasut ilaasa pisiartik iluaqutigisinnaajunnaarsimagamikku akiligassaqarfiit piumasaqaatai naapertuutinngitsutut misigisimasarpaat. IKIU pisuni amerlasuuni taamaallaat akiligassaqarfiup piumasaqaataata tunngavissaqarneranik uppernarsaanermigut innuttaasut ikiorsinnaasarpai – immaqa ernianik naatsorsuinermi kukkunernik iluarsiinermigut. Tamanna ikiuineruvoq, tassami pissutsinik paasinnitsitsiviusarpoq, aammalu akiliisitsiniartarfik akiliisitsiniartarfillu pillugit siunnersuinermik malitseqartinneqarsinnaalluni. Pisuni allani ajornartorsiutit pisisarnermut inatsisit malillugit amigaatinik nalunaaruteqarnissamut aammalu piffissaq eqqorlugu naammagittaalliuuteqarnissamut tunngasuusartut paasineqarpoq, tassanilu innuttaasoq ilitsersorneqarsinnaavoq.

IKIU-p siunnersuisarnera eqikkarlugu

Kalaallit Nunaanni akeqanngitsumik inatsisitigut ikiorserneqarnissamut pisariaqartitsineq annertuujusoq qularutigineqanngilaq, tassami innuttaasut amerlasuut inatsisinut tunngasunik apeqqutissaqartarput ajornartorsiuteqarlutilluunniit, taamaallaat IKIU-mut saaffiginninnermikkut paasisaqarfigisinnaasaminnik aaqqissinnaasaminnilluunniit.

Suliani, pisortani oqartussaasunit isumagineqartuni innuttaasut ajoraluartumik oqartussaasuniit pisariaqartinneqartunik ilitsersorneqarneq ajorput, suliassanik sullissinermut maleruagassat tunngaviusut malinneqartanngimmata, aammalu innuttaasut suliani taakkunani pisinnaatitaaffimminnik ilisimasaqartanngimmata. IKIU-p taakku pisinnaatitaaffii, aammalu qanoq isummerfiginissaat pillugit siunnersuinissaq, aammalu qanoq ilillutik suliani ingerlaqqinnissaat piginnaaneqarfigilluarpai.

Aamma inuinnarnut inatsisit, pingaartumillu nammaqatigiilluni akiligassaqarneq akiitsullu allat, atorfininnermut apeqqutit pisinermilu pisinnaatitaaffiit pillugit siunnersuinissaq annertuumik pisariaqartinneqarpoq.

Innuttaasut IKIU-mit siunnersorneqartarnerat pingaaruteqartorujussuuvoq – tamatumanilu suliat, innuttaasut isumaasa IKIU-p isumaanut tulluuffiusut, imaluunniit innuttaasut ajornartorsiutinik aalajangersimasunik iluarsiiniarnerini ikiuiffiusinnaasut kisimik pineqanngillat, aammali pisinnaatitaaffiisa pisussaaffiisalu suunerinik paasinnitsitsinissaq tassani pineqarpoq.

Ikiu-p ukiunut tulliuttunut takorluugai anguniagaalu

IKIU-p siulersuisui 2013-imi isumasioqatigiissitsinernik arlalinnik ingerlataqarpoq, taakkunanilu ukiuni tulliuttuni suliassatsinnut takorluukkavut anguniakkavullu oqaasertalerpavut:

Takorluukkat

Kalaallit Nunaanni inatsisinik ilisimasaqarnerup annerulernissaanut suleqataanissaq IKIU-mi takorloorneqarpoq, tassungalu aamma nammineerluni akisussaaffinnik ilisimaarinnilernissaq, kiisalu aaqqiagiinnginnernut atatillugu innuttaasut periarfissaat pillugit paasititsiniaanermik annertusaaqataanissaq ilaapput.

Anguniakkat:

  1. IKIU-p innuttaasunut politikkikkullu ersarinnerulersinneqarnissaa
  2. IKIU-mut soqutigisaqartut suleqatigilluarneqarnissaannik qulakkeerinissaq
  3. Akisussaaffiit pisinnaatitaaffiillu pillugit pingaartumik kalaallinut inuusuttunut paasititsiniaanerup pitsaanerulernissaanut ikiuunnissaq

Kalaallit Nunaanni innuttaasut akornanni IKIU-p ilisimaneqarnera suli annertusiartorpoq, tamannalu siulersuisut allattoqarfiullu nuannaarutigaa tulluusimaarutigalugulu.

 

Takorluukkavut anguniakkavullu naammassiniarlugit suliniutissagut tassaapput:

  1. Illoqarfinnut ilinniartoqarfiusunut angalanissatta salliutinneqarnissaa, taakkunanilu ilinniarnertuunngorniarfinni ilinniarfinniluunniit allani inatsisitigut pisinnaatitaaffiit akisussaaffiillu pillugit aaqqissuussinernik immikkut ittunik ingerlatsisoqarsinnaanera
  2. Nittartakkap naqitallu nutarterneqartarnissaasa isumaginissaat (kingulleq aningaasaateqarfinnit immikkut ittumik aningaasaliisoqarnissaa pisariaqartitsiviuvoq)
  3. Ullunut NGO-nut sammisaqartitsiviusinnaasunut peqataasarnissaq
  4. Inunnut tusagassiorfinnik/attaveqaqatigiinnermi aqqutinik attuumassutilinnik allanik atuisarnissaq
  5. Takorluukkavut naammassiniarlugit aningaasanik qinnuteqartarnissaq
  6. Innuttaasuni misissuinernik ingerlatsineq
  7. Inatsisilerinermut ataatsimiititaliami ilaasortaatitaqalernissamik qinnuteqarneq