2013-imut Ukiumoortumik nassuiaat

Siulersuisunut siulittaasumit, eqqartuussissuserisoq Britta Keldsen

 

Aallaqqaasiut

Inatsisitigut siunnersuisarfik IKIU imminut pigisoq ukiuni sisamani ingerlareerpoq. Innuttaasut oqartussaasullu IKIU-mik ilisimasaqarnerat annertusingaatsiarsimavoq, aammalu 2013-imi saaffiginnissutit ukiup siulianut sanilliullutik 100-t missaannik amerleriarsimapput. Kalaallit Nunaat tamakkerlugu saaffiginnissutinik tikittoqartarpoq, taakkulu pisortanut taamatullu inuinnarnut inatsisinut assigiinngitsorpassuarnut tunngasuusarput.

Kalaallit Nunaannut eqqartuussisaatsimut inatsimmi § 84, imm. 5 naapertorlugu IKIU tapiiffigineqarsinnaatitaasutut Inuinnarnut Aqutsisoqarfimmit akuerineqarsimavoq. IKIU-p kukkunersiuisumit atsiorneqartumik ukiumoortumik naatsorsuusiortarnissaa aammalu unatut ittumik ukiumoortumik nalunaarusiortoqarnissaa piumasarineqarluni tapiissutit tunniunneqartarput.

SIUNERTAQ

Kalaallit Nunaanni tamarmiusumi innuttaasut, akeqanngitsumik sullinneqarnissamut aningaasaqarnikkut piumasaqaatinik naammassinnittut akeqanngitsumik inatsisitigut sullinneqarnissaat IKIU-mi siunertaavoq.

Kisiannili IKIU-p suliassani suliani aalajangersimasuni siunnersuisarnermit annertunerusussatut isigaa, tassami innuttaasut oqartussaasullu pisinnaatitaaffii pillugit qaammarsaanikkut paasissutissiisarnerup annertusineqarnissaanut IKIU suleqataarusuppoq.

SIUNNERSUISARFIK NAATSUMIK

IKIU 12. februar 2010-mi pilersinneqarpoq, innuttaasunullu 1. juni 2010-mi ammarneqarluni. Pisortat eqqartuussissuserisut atorlugit inatsisitigut siunnersuisarneranni aaqqissuussinerit nalinginnaasut Kalaallit Nunaanni innuttaasut isertitakitsut inatsisitigut siunnersorneqarnissamut pisariaqartitsinerannut naammannginnerat IKIU-p pilersinneqarneranut tunngaviuvoq.

IKIU innuttaasut siunnersortinniartut inatsisilerituullu akornanni attaveqarnissamut ikiuunnermigut Kalaallit Nunaat tamakkerlugu innuttaasut inatsisitigut ikiorneqarnissaannik isumaginnittarpoq. Tamatuma saniatigut IKIU pisariaqartitsinermi oqalutseqartitsisarpoq. Kiisalu nunami sumiiffinnut, oqaatsinut, kulturimut suliassanullu tunngatillugu ajornartorsiutit, nalinginnaasumik innuttaasut namminneerlutik eqqartuussissuserisunut ikiortissarsiornerminni naammattoortagaasa atuutinnginnissaat IKIU-p anguniartarpaa.

ATTAVEQARFISSAT AMMASARFIILLU

Najugaq: Samuel Kleinschmidtip Aqq. 10, 3900 Nuuk.

Nammineerluni saaffiginninnikkut, oqarasuaatikkut, telefax-ikkut imaluunniit e-mail-ikkut(ikiu@ikiu.gl) IKIU-mut saaffiginnittoqarsinnaavoq. Allattoqarfik ataasinngornermiit tallimanngornermut nal. 9.00 aamma 15.00 akornanni ammasarpoq (oqarasuaat +299 32 45 48).

IKIU-p nittartagaraa www.ikiu.gl.

Ataasinngornermiit sisamanngornermut nal. 15.00 aamma 17.00 akornanni siunnersuisartut siumoortumik isumaqatigiissuteqareernermi oqarasuaatikkut imaluunniit nammineerluni saaffiginninnikkut naapinneqarsinnaapput. Tamatuma saniatigut mail-it akineqarnerisigut siunnersuisoqartarpoq.

AQUTSISUT

SIULERSUISUT

Siulersuisut IKIU-p qullersaatut oqartussaasuupput. Ingerlatsinerup pingaarnerup pilersaarusiornissaanut siulersuisut akisussaasuupput. Tamatumani pingaartumik naatsorsuusiorneq naatsorsuutinillu akuersisarneq, kiisalu aalajangigassanut pingaarnernut aalajangiisarneq pineqarput.

IKIU suliffeqarfiummat imminut ingerlattoq, taamaalillunilu ilaasortaqanngitsoq piginnitseqanngitsorlu, siulersuisut imminnut isumagisuupput. nuit pingasuniit tallimanut amerlassuseqartussaapput, taakkulu manna tassaapput:

  • Eqqartuussissuserisoq Britta Keldsen (siulittaasoq)
  • Eqqartuussissuserisoq Thomas Trier Hansen
  • Eqqartuussisoq Birgit Skriver
  • Eqqartuussissuserisoq Naja Joelsen
  • Inatsisartuni Folketingimilu ilaasortaq Sara Olsvig

ULLUINNARNI AQUTSINEQ

 

Allattoqarfiup ulluinnarni ingerlatsineq isumagisaraa, tassunga pingaartumik aningaasaqarneq inniminniinermilu isumaqatigiissutit ilaallutik. Aamma journaliseeriineq, innuttaasut saaffiginnissutaannik suliaqarneq, nittartakkap ingerlaavartumik nutarterneqartarnera, sinerissamut angalanissanik pilersaarusiorneq ataqatigiissaarinerlu, kalaallisut-qallunaatut nutserineq (oqaluttaaneq taamatullu najoqqutassanik allassimasunik nutserineq) suliarineqartarput.

Allattoqarfik allattoqarfimmi pisortamit, siulersuisut siulittaasuannik suleqateqartumit aqunneqarpoq.

INIT

IKIU Nuup qeqqani peqatigiiffiit suliffeqarfiillu imminnut pigisut allat allaffeqarfeqatigalugit inissisimavoq. Siunnersuisarfiup illoqarfiup qeqqanut inissinneqarnerani IKIU ornikkuminarnerujussuanngorsimavoq, tamannalu aamma allattoqarfimmi pisortap suliaminut nuannarinninneranut sunniuteqarluarsimavoq, tamanna NGO-ik allanik suleqateqarsinnaanermut periarfissiimmat.

SIUNNERSORTIT NAMMINNEQ PIUMASSUTSIMINNIK AKISSARSIAQARATILLU SULISUT

2013-imi inatsisilerituut, namminneq piumassutsiminnik akissarsiaqaratillu sulisut, siunnersuinermik suliaqartut 12-it missaanniipput. Taakku pingaartumik eqqartuussissuserisut allaffeqarfiini, pisortani oqartussaasuni aamma ingerlatseqatigiiffinni Namminersorlutik Oqartussanit pigineqartuni atorfeqarput. IKIU siunnersortissanik nutaanik pissarsiortuarpoq, IKIU-mi suliffeqarfiit allat assigalugit sulisut sukkangaatsiartumik taarseraattarmata.

ANINGAASAQARNEQ

IKIU inatsisitigut siunnersuisarfittut, tapiiffigineqarnissamik pisinnaatitaaffeqartutut Inuinnarnut Aqutsisoqarfimmit akuerisaavoq. 2013-imi tapiissutit 1.005.000 koruuniupput, 2012-imi tapiissutigineqartut amerlaqatigalugit. IKIU aamma 2013-imi Nunafonden-imit katillugit 60.000 koruuningajannik tapiiffigineqarpoq, siunnersuisarfiup ininut nutaanut nuunneranut atatillugu pequtisiniarnissamut, kiisalu naqitaliornissamut tv-kkullu paasissutissiinissamut piffissamik pisinissamut immikkoortinneqartunik. Internetimut oqarasuaatinullu aningaasartuutinut suli TELE Greenland A/S aningaasalersuisuuvoq.

Kukkunersiuisoq nalunaarsorsimasoq Per Abelsen 2013-imut Ukiumoortumik Nalunaarummut oqaaseqaatimini ilisimatitsivoq, nammineq isummani malillugu nalunaarut IKIU-p aningaasaqarnerani pissutsinut eqqortumik takutitsisoq, aammalu tunuarsimaarfeqarnissamut tunngavissiinngitsoq. Aamma isornartorsiuiffiusunik oqaaseqaateqartoqanngilaq.

2013-imi naatsorsuutinut tunngatillugu ataatsimut imatut oqaaseqaateqartoqarpoq:

2013-imi IKIU Nuup qeqqani najukkamut nutaamut nuuppoq. Tamatumunnga atatillugu ajoraluartumik piffissami tassani ineqarnermut marloriaammik akiliisoqarpoq.

Aningaasartuutit ikinngitsut sulinermut atatillugu angalanernut tunngasuupput, taakkulu 2013-imi 93.479 koruuninik amerlassuseqarput (2012-imi aningaasartuutit 86.275 koruuniupput). IKIU-mit innuttaasut tamarmik anguneqarsinnaassappata sulinermut atatillugu angalanerit pisariaqarput, Kalaallillu Nunaata annertunera pissutigalugu angalanerit taamaattut aningaasartuutinik amerlasuunik kinguneqartarput. 2013-imi IKIU Siunnersuisoqatigiinnut Ataatsimiititalianullu Aqutsisoqarfik aamma Sullivimmi Ajoqusersinnaanermut Sullissivik sulinerminnut atatillugu Kalaallit Nunaata avannaani ulluni 14-ini angalasut peqatigalugit angalasinnaasimavoq, tassanilu illoqarfiit Maniitsoq, Sisimiut, Aasiaat, Qeqertarsuaq, Ilulissat aamma Qasigiannguit nunaqarfiilu katillugit 13-it siunnersuisarfimmit tikeraarneqarput. Sulinermut atatillugu angalanermi innuttaasut katillugit 245-t saaffiginnipput, IKIU-miillu sulinermut atatillugu angalaneq saaffiginnittut amerlassusiinut uuttorlugu, kisiannili aamma IKIU-p ilisarisimaneqalernissaanut atatillugu iluatsilluartutut isigineqarpoq.

Sulisunut aningaasartuutit ikilisarniarlugit IKIU aalajangerpoq, 2013-imi sulisut ilallugit atorfinitsitsiniarani, taamaattumillu allattoqarfik allattoqarfimmi pisortamit taamaallaat aqunneqarsimavoq, naatsorsuuserinikkut naatsorsuusiornikkullu pisariaqartinneqartumik ikiorteqartumit.

Allattoqarfimmi pisortaq missingersuutini siunnerfigineqartutut 2013-imi advosys-imut pikkorissaqataavoq. Tamatuma saniatigut IKIU aalajangersoq, allattoqarfimmi pisortap tarnit pissusaannik ilisimasalimmit siunnersorteqarneranut aningaasartuutinut akiliiniarluni – taamaalilluni pisortaq ulluinnarni innuttaasunik attaveqarnermini ajornartorsiutinik naapittakkaminik qaangiiniarnissamut pisariaqartinneqartumik tapertaqartinneqarpoq naleqquttunillu sakkussaqartinneqarluni.

IKIU-p aningaasaqarnera pillugu annertunerusumik paasisaqarusunnermi 2013-imut Ukiumoortumik Nalunaarusiaq innersuussutigineqarpoq.

IKIU-P SIUNNERSUISARNERA

IKIU inatsisitigut suliassaqarfippassuarnut tunngasunik siunnersuisarpoq – taakku pisortanut inuinnarnullu inatsisinut tunngasinnaapput. Siunnersuisarnermi suliassanut atatillugu sullissisoqarneq ajorpoq, kisiannili suliat ilaanni IKIU allagaatinik takunninnissamut ikiuuttarpoq, aammalu suliani allani oqartussaasunut allakkiornermi IKIU ikiuuttarluni. Suliat nalinginnaasumik pisariusarput, aammalu sullissinermi annertuumik kukkuffiusimasarlutik.

SULLINNIAKKAT

IKIU Kalaallit Nunaanni tamarmiusumi innuttaasunut, akeqanngitsumik sullinneqarnissamut aningaasaqarnikkut piumasaqaatinik naammassinnittutut isumaqarfigineqartunut siunnersuisarpoq. Tassalu inunnut isertitassatut killiliussat sinnerlugit isertitaqartunut, suliffeqarfinnut imaluunniit pisortani oqartussaasunut inatsisitigut ikiuuttoqartanngilaq.

Aamma pasisat unnerluussallu pissutsinut, pasinninnermut unnerluussinermulluunniit attuumassuteqartunut siunnersorneqartanngillat. Pinerluttulerinermi sulianut tunngassutillit illersuisumut apeqqutigineqartassapput.

IKIU-p malittarisassaanni imm. 3.3.4 naapertorlugu aamma ”suliani, ingerlatsinermi oqartussaasunut tunngasuni imaluunniit suliarineqartuni, ilitsersuineq siunnersuinerlu pisariaqartinneqartumik oqartussaasunit isumagineqartoq isumaqarfigineqarpat” siunnersuisoqartanngilaq. Kisiannili IKIU-p siunnersuisarnerani annikitsuunngitsut pissutsinut, pisortani oqartussaasunit suliarineqartunut tunngasuusarput, taakkunani akuttunngitsumik kukkusoqartarmat (soorlu tunngavilersuutitaqanngitsut, maalaaruteqarnissamut ilitsersuutitaqanngitsut, akuusunut tusarniaanertaqanngitsut imaluunniit piffissami sivisuallaami suliarineqarsimasut), imaluunniit innuttaasup pisariaqartinneqartumik ilitsersuunneqarsimanani misigisimasarmat.

SULINERMUT ATATILLUGU ANGALANERIT

Kalaallit Nunaata nunataani sumiiffiit pissutaallutik IKIU innuttaasunut Nuup avataani najugalinnut siunnersuiniarluni sulinermut atatillugu angalasariaqartarpoq. Inatsisilerituumik naapitsisinnaanissaq innuttaasunut isumaqartorujussuusarpoq. Tamatumani pingaartumik pissutsit inunnut tunngasut eqqarsaatigineqarput. Aamma IKIU-mut tunngatillugu aammalu IKIU-p siunnersuisarnera pillugu paasisimasaqarnerulernissaq pingaaruteqartorujussuuvoq. Tamatuma saniatigut IKIU-mi Kalaallit Nunaat tamakkerlugu inatsisitigut ajornartorsiutaasartut ilisimaarilluarneqarput.

2013-imi apriilimi IKIU Upernavimmiippoq Ilulissaniillunilu, taakkunanilu saaffiginnittut 15-it missaanniipput.

2013-imi ulluni 14-ini Kalaallit Nunaata avannaani angalasoqarpoq, tassanilu illoqarfiit/nunaqarfiit katillugit 19-it tikeraarneqarput, taakkunanilu saaffiginnissutit katillugit 245-uupput.

Angalanerni najukkani eqqartuussiviit nunaqarfiillu allaffii nalinginnaasumik ininik atukkiussaqartarput, tamannalu ingerlalluartorujussuusimavoq.

INATSISILERINERMI SULIASSAQARFIIT KISITSISITIGULLU PAASISSUTISSAT

2013-imi IKIU saaffiginnissutinik 1100-t sinnerlugit tigusaqarpoq. IKIU-p ilisimaneqarnera annertusarniarlugu paasititsiniaanernik ingerlataqarpugut, pisortani sullissivinnut eqqartuussivinnullu attaveqarpugut, aammalu ukiumoortumik sulinermut atatillugu angalasarpugut. Aamma innuttaasut akunnerminni akeqanngitsumik inatsisitigut siunnersorneqarsinnaanermik periarfissaqartoqarneranik oqaluttuuteqattaarnerisigut ilisimanninneq annertusiartorpoq.

2014-imi Kalaallit Nunaanni illoqarfiit ilinniartoqarfiusut, taamaalillunilu aamma ilinniarfiit tikeraaqattaarnerisigut aaqqissuussaanerup eqqumaffigineqarnerata annertunerulersinneqarnissaa IKIU-mit kissaatiginqearpoq.

IKIU-p naliliinera malillugu Kalaallit Nunaanni inatsisitigut siunnersorneqarnissamik pisariaqartitsineq annertoorujussuuvoq, aammalu saaffiginnissutit, IKIU-mit tiguneqartut pisariaqartitsinerpiamik ersersitsinngitsut isumaqartoqarpoq. IKIU pisariaqartitsinermut kisitsisitigut paasissutissanik peqanngilaq, kisiannili saaffiginnissutinit amerlasuut tunngavimmikkut inatsisitigut ajornartorsiornermut tunngasuupput, tamannalu inatsisitigut ikiorserneqarnissamik pisariaqartitsinerup annertuneranut takussutissatut isigineqarsinnaavoq. Taamatut paasinninneq aamma nammineerlutik piumassutsiminnik siunnersuisartut ingerlatsivinni imaluunniit eqqartuussissuserisut allaffiini atorfimminnit nalinginnaasunit misilittagaannut naapertuuppoq.

ILAQUTARIINNERMUT ISUMAGINNINNERMULLU INATSISIT

Ilaqutariinnermut isumaginninnermullu inatsisinut suliassaqarfik pillugu saaffiginnissutit amerlanersaat angajoqqaatut oqartussaanermut aamma averusernermut/avinnermut tunngasuusarput. Taakku pillugit saaffiginnissutinut atatillugu siunnersuisarneq immikkut oqaaseqarnissamut tunngavissiinngillat. IKIU inatsisitigut tunngavissanik, aammalu innuttaasup pisumut aalajangersimasumut qanoq iliuuseqarsinnaaneranut siunnersuisarpoq.

Kisiannili angerlarsimaffiup avataanut inissiisarnerit pillugit saaffiginnissutit oqaaseqarnissamut tunngavissiipput. Tamatumunnga kisitsisitigut paasissutissat pissutaavallaanngillat, kisiannili pissutsinut, innuttaasunit nassuiaatigineqartunut tunnganerullutik.

IKIU arlaleriarluni innuttaasunik, angerlarsimaffiup avataanut inissiinermi pissusiviusunik inatsisitigullu tunuliaqutaasunik naammattumik ilisimatinneqarsimanngitsunik naammattuuisarpoq, taamatullu aamma ingerlatsivik angerlarsimaffiup avataanut inissiinernik atorunnaarsitsissappat piumasaqaatit suut naammassineqartussaanersut pillugu paasissutissinneqartarsimanngillat.

IKIU suliassanik sullissinerpianik suliaqarneq ajormat, taamaattumillu ingerlatsivimmut attaveqartarani, suliassanik sullissinerpiaat pillugu IKIU annertunerusumik nassuiaateqarsinnaanngilaq. Kisianni pisuni arlalinni suliassanik sullissinermi annertuumik kukkusoqartarsimasoq qularutigineqanngilaq.

ATORFINITSINNEQARNERMUT INATSISIT

Atorfinitsinneqarnermut inatsisinut tunngatillugu saaffiginnissutit akissarsiat, soraarsitaaneq atorfinitsinneqarnermilu isumaqatigiissutit pillugit apeqqutinut tunngasuunerusarput

Soraarsitaanermut tunngatillugu apeqqutit pingaartumik, innuttaasut piffissamik sivikitsumik periarfissinneqarluni (periarfissinneqaraniluunniit) soraartitaasarnerinut, imaluunniit naammattunik paasissutissinneqarnerani soraartitaasarnerinut tunngasuunerusarput. Innuttaasut taakku sunik pisinnaatitaaffeqarnersut, aammalu pissutsit qanoq iliorunik pitsaanerpaamik isumagisinnaaneraat pillugu IKIU-p ikiortarpai.

TAARSIISSUTIT

Taarsiissuteqartarneq pillugu saaffiginnissutit, IKIU-mit tiguneqartartut, pingaartumik inunnik ajoqusertoqarnerani taarsiissutinut tunngasuusarput. Kisiannili aamma innuttaasup amigaatilinnik pisiaqarsimalluni taarsiiffigineqarnissamut pisinnaatitaaffeqarsorinera pillugu saaffiginnissutinik tigusaqartoqartarpoq. Tassanili saaffiginnissutit pisinermi pisinnaatitaaffinnut/amigaateqarnermut nalunaarutinut tunngasuunerusarput.

Inunnik ajoqusertoqarnerani taarsiissutissat pillugit saaffiginnissutit ilaat ajoqutinut nutaanngitsunut, ajoqusiisumut piumasaqaateqarfiusinnaajunnaareersunut tunngasuusarput. Tamatumunnga taarsiissuteqarnissamut piumasaqarsinnaanerup nutaanngilinera, imaluunniit pissutsit, ajoqusiisup akisussaaffigisinnaasaannik uppernarsaanissamut ajornarsereertarnerat pissutaasinnaavoq. Piffissap sivisuneranut nassuiaatitut innuttaasut ilaasa pisinnaatitaaffimminnik siunnersuisinnaasunik saaffiginniffissaqannginnertik innersuussutigisarpaat.

Ajoqusernerit, innuttaasut sulitillutik ajoqusernertut isigisaat pineqartillugit, sullivimmi ajoqusernermut taarsiiffigineqartarneq pillugu maleruagassanik sulisitsisumit naammattumik nassuiaanneqarsimanatik , aammalu piffissami ajoquserfiusumi avataanit ilitsersuisussaqanngitsutut innuttaasut akuttunngitsumik misigisimasarput. Taamatut pisariaqartitsinermut IKIU suleqataasarpoq.

AKIITSUNUT TUNNGASUT

Saaffiginnissutit amerlasuut akiitsunut tunngasuusarput, taakkunanilu innuttaasut akiitsoqarnerminnut tunngaviusunik paasinnissinnaasanngillat. Matumani tunngaviusartut marluupput: Aapparisimasarlu akiligassanik nammaqatigiinnermi akiitsut aammalu pigisanik kingusinnerusukkut naleeruttunik akilersuilluni pisinermi akiitsut.

Nammaqatigiilluni akiligassaqarnerup, pingaartumik averusernerup avinnerullu kingorna atuutiinnartinneqartup annertussusia kingunerisassaaluunniit innuttaasut ilaasa paasiuminaatsittarpaat. Taamatut pisoqartillugu ilaatigut akiitsuni atugassarititaasut, kisiannili aamma akiligassaqarfiit inatsisitigut malersuisinnaanerat (akiliisitsiniartarfik akiliisitsiniartartullu) pillugu innuttaasut pisinnaatitaaffiinik pisussaaffiinillu paasisaqarniarneranni IKIU ikiuussinnaavoq. Tamatuma saniatigut aamma nammaqatigiilluni akiligassaqarnermi qanoq inisisimanerat pillugu IKIU nassuiaasinnaavoq ilitsersuisinnaallunilu.

Innuttaasunik pigisat akilersorlugit pisiarisimasatik tammarsimagaluartut, aserorsimagaluartut allamilluunniit peqquteqartumik naleerussimagaluartut suli akiitsunut akilersuisussaatitaanerminnik paasinnissimanngitsunik IKIU naammattuuisarpoq. Innuttaasut ilaasa pisiartik iluaqutigisinnaajunnaarsimagamikku akiligassaqarfiit piumasaqaatai naapertuutinngitsutut misigisimasarpaat. IKIU pisuni amerlasuuni taamaallaat akiligassaqarfiup piumasaqaataata tunngavissaqarneranik uppernarsaanermigut innuttaasut ikiorsinnaasarpai – immaqa ernianik naatsorsuinermi kukkunernik iluarsiinermigut. Tamanna ikiuineruvoq, tassami pissutsinik paasinnitsitsiviusarpoq, aammalu akiliisitsiniartarfik akiliisitsiniartarfillu pillugit siunnersuinermik malitseqartinneqarsinnaalluni. Pisuni allani ajornartorsiutit pisisarnermut inatsisit malillugit amigaatinik nalunaaruteqarnissamut aammalu piffissaq eqqorlugu naammagittaalliuuteqarnissamut tunngasuusartut paasineqarpoq, tassanilu innuttaasoq ilitsersorneqarsinnaavoq.

IKIU-P SIUNNERSUISARNERA EQIKKARLUGU

Kalaallit Nunaanni akeqanngitsumik inatsisitigut ikiorserneqarnissamut pisariaqartitsineq annertuujusoq qularutigineqanngilaq, tassami innuttaasut amerlasuut inatsisinut tunngasunik apeqqutissaqartarput ajornartorsiuteqarlutilluunniit, taamaallaat IKIU-mut saaffiginninnermikkut paasisaqarfigisinnaasaminnik aaqqissinnaasaminnilluunniit.

Suliani, pisortani oqartussaasunit isumagineqartuni innuttaasut ajoraluartumik oqartussaasuniit pisariaqartinneqartunik ilitsersorneqarneq ajorput, suliassanik sullissinermut maleruagassat tunngaviusut malinneqartanngimmata, aammalu innuttaasut suliani taakkunani pisinnaatitaaffimminnik ilisimasaqartanngimmata. IKIU-p taakku pisinnaatitaaffii, aammalu qanoq isummerfiginissaat pillugit siunnersuinissaq, aammalu qanoq ilillutik suliani ingerlaqqinnissaat piginnaaneqarfigilluarpai.

Aamma inuinnarnut inatsisit, pingaartumillu nammaqatigiilluni akiligassaqarneq akiitsullu allat, atorfininnermut apeqqutit pisinermilu pisinnaatitaaffiit pillugit siunnersuinissaq annertuumik pisariaqartinneqarpoq

Innuttaasut IKIU-mit siunnersorneqartarnerat pingaaruteqartorujussuuvoq – tamatumanilu suliat, innuttaasut isumaasa IKIU-p isumaanut tulluuffiusut, imaluunniit innuttaasut ajornartorsiutinik aalajangersimasunik iluarsiiniarnerini ikiuiffiusinnaasut kisimik pineqanngillat, aammali pisinnaatitaaffiisa pisussaaffiisalu suunerinik paasinnitsitsinissaq tassani pineqarpoq.

2013-imi takorluukkat pillugit sulineq – 2014-imi siunissamut takorluukkat

IKIU-mi siulersuisut 2013-imi isumasioqatigiinnernik arlalinnik ingerlataqarput, tassanilu ilaatigut takorluukkavut anguniakkavullu pillugit suliaqarnissamut periarfissarsivugut:

Takorluukkat:

Kalaallit Nunaanni inatsisinik ilisimasaqarnerup annerulernissaanut suleqataanissaq IKIU-mi takorloorneqarpoq, tassungalu aamma nammineerluni akisussaaffinnik ilisimaarinnilernissaq, kiisalu aaqqiagiinnginnernut atatillugu innuttaasut periarfissaat pillugit paasititsiniaanermik annertusaaqataanissaq ilaapput.


 

 Anguniakkat:

IKIU-mi anguniarneqarpoq

  1. IKIU-p innuttaasunut politikkikkullu ersarinnerulersinneqarnissaa
  2. IKIU-mut soqutigisaqartut suleqatigilluarneqarnissaannik qulakkeerinissaq
  3. Akisussaaffiit pisinnaatitaaffiillu pillugit pingaartumik kalaallinut inuusuttunut paasititsiniaanerup pitsaanerulernissaanut ikiuunnissaq.

Kalaallit Nunaanni innuttaasut akornanni IKIU-p ilisimaneqarnera suli annertusiartorpoq, tamannalu siulersuisut allattoqarfiullu nuannaarutigaa tulluusimaarutigalugulu.

2014-imut takorluukkavut anguniakkavullu naammassiniarlugit suliniutissagut tassaapput:

  1. Illoqarfinnut ilinniartoqarfiusunut angalanissatta salliutinneqarnissaa, taakkunanilu ilinniarnertuunngorniarfinni ilinniarfinniluunniit allani inatsisitigut pisinnaatitaaffiit akisussaaffiillu pillugit aaqqissuussinernik immikkut ittunik ingerlatsisoqarsinnaanera
  2. Nittartakkap naqitallu nutarterneqartarnissaasa isumaginissaat (kingulleq aningaasaateqarfinnit immikkut ittumik aningaasaliisoqarnissaa pisariaqartinneqarpoq)
  3. Ullunut NGO-nut sammisaqartitsiviusinnaasunut peqataasarnissaq
  4. Inunnut tusagassiorfinnik atuisarnissaq
  5. Takorluukkavut naammassiniarlugit aningaasanik qinnuteqartarnissaq
  6. Innuttaasuni misissuinernik ingerlatsineq
  7. Inatsisilerinermut ataatsimiititaliami ilaasortaatitaqalernissamik qinnuteqarneq

 

Neriuppunga matuma siuliani allaaserineqartut 2013-imi IKIU-p suliarisimasaanut ataatsimut paasissutisseeqataajumaartut.

 

/Britta Keldsen, siulittaasoq